दगड, काच, पाणी

-

 

दगड

जिथल्या तिथं

वर्षानुवर्ष..

बाहेरून शक्ती मिळाल्यावर

त्याचा बनतो देव

किंवा फुटतं एखाद्याचं डोकं

अन्यथा दगड

जिथल्या तिथं.


काच

रंगीत, तर कधी साधी

पारदर्शक, कधी धुरकट

काचेतून खरंही दिसतं, आणि खोटंही

खोटंच, पण खरं भासणारं

काच फुटलीच तर

धारदार, टोकदार, जीवघेणी

अन्यथा स्वच्छ..

आत आणि बाहेर सारखीच


पाणी

नितळ, स्वच्छ, प्रवाही

कुठलाच अट्टाहास नसणारं

ओता कुठेही, अन् मिसळा कशातही

अगदी बिनतक्रार.

एक एक थेंब महत्त्वाचा

एका एका श्वासासाठी

किंमत तेव्हाच कळते त्याची

जेव्हा लागतो ठसका किंवा

कोरडा पडतो घसा

नाहीतर पाणी

वाहत राहतं..

जागा मिळेल तिथं

प्रयोजनाशिवाय..


- श्रीराम हसबनीस

४ ऑक्टोबर २०२३

टिप्पण्या

टिप्पणी पोस्ट करा

या ब्लॉगवरील लोकप्रिय पोस्ट

चित्रसमज

-
इमेज
  चित्र: श्रीराम हसबनीस दोन एक वर्षांपूर्वीची गोष्ट असेल. मुंबईतल्या नेहरू सेंटरच्या आर्ट गॅलरीमध्ये अॅबस्ट्रॅक्ट चित्रांचं प्रदर्शन बघायला गेलो होतो. साधारणपणे आपल्याकडे कला प्रदर्शनाच्या ठिकाणी एकावेळेस दहा बोटांचा वापर करून मोजता येतील इतकेच चित्ररसिक बघायला मिळतात. आपल्या आवडीनुसार आणि सवडीनुसार ते चित्रं बघत असतात. आता अमूर्त चित्र म्हटल्यानंतर सहसा ओळखू न येणारे आकार असं सर्वसाधारण गणित असतं. मी हळूहळू एक एक चित्र बघण्यात रंगलो होतो. याच वेळी एक बाई प्रदर्शन बघायला आत शिरल्या. साधारण पाच-सहा वर्षांचा मुलगा त्यांच्या बरोबर होता. आत शिरल्याशिरल्या त्यांनी नजरेच्या एका टप्प्यात जेवढी चित्र बघता येतील तेवढी बघितली. चित्रांबद्दलच्या त्यांच्या पूर्वग्रहाला अगदीच धुडकावून लावणारी अमूर्त चित्रं बघून त्यांच्या चेहऱ्यावर कुतूहल किंवा आश्चर्य या दोन्ही भावनांपेक्षा, बसच्या गर्दीत शिरल्यावर एकही रिकामी सीट दिसली नाही तर जसा चेहरा होतो तसा काहीसा भाव त्यांच्या चेहऱ्यावर तरळत होता. आता मुंबईचा उकाडा पाहता ए. सी. आर्ट गॅलरीत शिरल्यावर क्षणभर माणसाचं तन आणि मन शांत होतं. म्हणूनच असेल कदाचित,...
अधिक वाचा

लहानपण दे गा देवा

-
इमेज
चित्र: श्रीराम हसबनीस लहानपण दे गा देवा जगप्रसिद्ध चित्रकार पाब्लो पिकासो यांनी म्हटलंय “राफाएलच्या तोडीचं चित्र काढायला मला चार वर्षे लागली पण लहान मुलासारखं चित्र काढता येण्यासाठी मला पूर्ण आयुष्य वेचावं लागलं.” या वाक्याचा अर्थ काय? लहान मुलासारखं चित्र काढायचं असेल तर मग त्यासाठी कलाशिक्षण कशाला? शिवाय असं चित्र काढायला तर कुणालाही जमेल. त्यासाठी चित्रकला ही निसर्गदत्त देणगी असण्याची काहीच गरज नाही. कोणीही सहज चित्रकार बनू शकेल. असे अनेक प्रश्न साधारणपणे निर्माण होतील. याचाच धांडोळा घेण्यासाठी हा लेखनप्रपंच. आता एवढ्या मोठ्या चित्रकारालाही लहान मुलासारखं चित्र का काढायचंय? केवळ पिकासोच नव्हे तर स्विस चित्रकार पॉल क्ली यांनंदेखील लहान मुलांच्या चित्रकलेचं निरीक्षण आणि अभ्यास केला होता. आता यात अप्रूप ते काय असेल? का बरं त्यांना लहान मुलांची चित्रं महत्त्वाची वाटतात? आता आपण हे थोडं विस्ताराने पाहू. ज्ञान, विचार, कल्पनाशक्ती आणि उत्स्फूर्तता हे चार घटक आपल्याला अगोदर समजून घ्यावे लागतील. म्हणजे मग आपल्याला आपल्या मूळ विषयाच्या दृष्टीने योग्य अर्थ लावणे सोयीचे जाईल. ज्ञान- कोणतीही गो...
अधिक वाचा